नयाँ वर्षमा घुम्न जाने योजनामा हुनुहुन्छ ? यी हुनसक्छन् उपयुक्त गन्तव्य

रातोघर

 २८ चैत्र २०७५, बिहीबार २०:३७  मा प्रकाशित

काठमाडौं ।

नयाँ वर्षसँगै मानिसहरु नयाँ जोश, जाँगर र उमंगका साथ विभिन्न योजनाहरु बुन्छन् । त्यस्ता योजनाले सार्थकता पाउलान् वा नपाउलान् त्यो आफ्नो ठाउँमा छ । त्योभन्दा पहिले नयाँ वर्षको पहिलो दिन हरेक मानिस विशेष बनाउन चाहान्छन् ।

त्यो एक दिन हाँसी खुशी र रमाइलोसँग बित्यो भने वर्षभरी नै त्यही रमाइलो र सुखका साथ समय बित्छ भन्ने मान्यता पनि राख्छन् । कतिपय नयाँ वर्षको शुभकामना आदान–प्रदानकासाथै साथीभाइ, आफन्त तथा घरपरिवारसँग एकदिन भए पनि रमाइलोसँग कसरी बिताउने भन्ने द्विविधामा पनि हुन सक्छन् ।

व्यस्त जीवनशैली, कामको बोझबाट एकदिन भएपनि छुटकारा लिएर आराम लिनको लागि आफ्नो पायक पर्ने रमणीय क्षेत्रको घुमघाम नै उत्तम विकल्प हुन सक्छ ।

काठमाडौं उपत्यकामा बस्ने मानिसहरुका लागि वैशाख १ लाई विशेष बनाउने थुप्रै ठाउँ छन् । विशेष गरी युवा जोडी र पारिवारिक भ्रमणका लागि यी स्थानहरु उत्कृष्ट गन्तव्य हुन सक्छन् । जसको केही जानकारी यहाँ प्रस्तुत गरिएको छ ।

कालिञ्चोक

कालिञ्चोक भगवती दोलखा जिल्लामा अवस्थित धार्मिक पर्यटकीय स्थल हो । काठमाडौंदेखि चरिकोट १ सय ३२ किलोमिटर पर्छ भने सदरमुकाम चरिकोटबाट १५ किलोमिटर उत्तर कालिञ्चोक गाविसमा अवस्थित यो मन्दिर समुन्द्री सतहबाट ३ हजार ८ सय ४२ मिटरको उचाईमा छ ।

कालिञ्चोक भगवती जानका लागि काठमाडौंबाट जाँदा पुरानो बसपार्कबाट सदरमुकाम (चरिकोट) सम्म बसमा जान सकिन्छ । काभ्रे, सिन्धुपाल्चोकका रमणीय प्राकृतिक स्रोत अवलोकन गर्दै खोला–नाला, झरनाको दृश्यावलोकन गर्दै चरिकोट पुग्न सकिन्छ ।

सार्वजनिक सवारी साधनमा जाँदा ४ सय रुपैयाँ भाडा लाग्छ । काठमाडौंबाट ५ घण्टाको अवधिमा चरिकोट पुग्न सकिन्छ । चरिकोटबाट अर्को बसमा कुरीसम्म जानुपर्ने हुन्छ । बसले २ घण्टाको अवधिमा कुरिसम्म पुर्याउँछ । बस र जीप  कुरीसम्म आवतजावत गरिरहन्छन् ।

सवारी साधन रिर्जभ गरेर जाँदा एउटै सवारीमा कुरीसम्म पुग्न सकिन्छ । कुरीबाट केबलकारमा चढेर केही मिनेटमै कालिञ्चोक भगवती पुग्न सकिन्छ भने हिड्दै पनि जान सकिन्छ । हिड्नेहरु कुरीबाट डेढ घण्टामा मन्दिर पुग्छन् । कालिञ्चोक अर्को विशेषता भनेको पानी पर्दा र मौसम चिसो हुने बित्तिकै हिउँ पर्न शुरु हुन्छ ।

कालिञ्चोक डाँडाबाट रोल्वालिङ हिमश्रृङखला, जुगल हिमाल, गौरीशंकर हिमाल, गणेश हिमाल, शैलुङ डाँडाको दृश्यावलोकन गर्न सकिन्छ । यहाँ घुम्न जानेहरुका लागि चौरीको मासु, कुखुराको भाले, फापरको डिँढो, गुन्द्रुक लगायत विभिन्न खानाका परिकारहरु पनि विशेष हुन सक्छ ।

जिरी

दोलखाकै जिरी घुम्नका लागि अर्को आकर्षक गन्तव्य हुन सक्छ । जिरीलाई नेपालको स्वीजरल्याण्ड पनि भनिन्छ । काठमाडौंबाट १८४ किलोमिटरको दूरीमा रहेको जिरीको मनमोहक हरियाली र झरना तथा परम्परागत बस्ती पर्यटकका लागि विशेष आकर्षक हुन् ।

समुन्द्री सतहबाट १ हजार ९ सय ५ मिटरको उचाइमा रहेको छ । जिरीलाई सगरमाथाको प्रवेशद्वारका रुपमा पनि लिइन्छ । घुम्नका लागि रमणीय स्थानहरु भएको जिरीमा बस्नका उपयुक्त होटलहरुको पनि व्यवस्था छ ।

सामान्यतया दुई-तीन दिनको अवधिमा जिरी घुम्नका लागि पर्याप्त भएपनि निजी सवारी साधनमा जान सकेमा एक दिनको यात्रा पनि बन्न सक्छ । सार्वजनिक यातायातमा जाने हो भने काठमाडौंको पुरानो बसपार्कबाट जिरी जाने बस चढेर पनि पुग्न सकिन्छ ।

जिरी आसपासका चेर्दुङ र हनुमन्तेबाट रोल्वालिङ हिमालहरु, दोलखा र रामेछापका अधिकांश गाउँ तथा बस्तीको अवलोकन गर्न सकिन्छ ।

धुलिखेल

काभ्रेको धुलिखेललाई पर्यटकीय स्थलका रुपमा लिइन्छ । धुलिखेल जानेहरु विशेषगरी पिकनिक तथा घुम्नका लागि जाने गर्छन् । धुलिखेलका केही त्यस्ता प्रसिद्ध स्थानहरु पनि छन् जहाँ रमाइलो गर्नकै लागि आन्तरिक र बाह्य पर्यटकहरुको भीड लाग्ने गर्दछ ।

नमोबुद्ध: काठमाडौंबाट नमाेबुद्ध जाने हो भने पुरानो बसपार्कबाट बनेपासम्म गाडीमा जानुपर्छ । बनेपा बसपार्कबाट नमोबुद्ध जाने बस चढेपछि १ घण्टाको समयमा पुगिन्छ । यसको अधिकतम उचाइ १८ सय मिटरसम्म छ । नमोबुद्धबाट गौरीशंकर, लाङटाङ लगायतका हिमालहरुको मनोमोहक दृश्य नियाल्न सकिन्छ ।

हजार सिँढी: त्यस्तै धुलिखेलको अर्को प्रसिद्ध स्थल हो- हजार सिँढी । धुलिखेल चोकबाट हिड्दै जाँदा निकै मज्जा आउने ठाउँ । जसको छुट्टै पहिचान पनि छ । एक हजार सिढी उकालो चढ्दै त्यहाँ पुग्न सकिन्छ । सिँढीको अन्तिम विन्दुमा देवस्थल मन्दिर छ । मन्दिरबाट केही अगाडि एउटा ठूलो अग्लो ढुंगा छ ।

जहाँ आन्तरिक तथा बाह्य पर्यटकहरु ढुंगामा बसेर मनोरम दृश्य अवलोकन गर्नुका साथै तस्वीर खिच्नका लागि निकै रुचाउँछन् । ढुंगाबाट विभिन्न हिमश्रृंखला, पर्यटकीय नगरी धुलिखेलका प्राकृतिक दृश्य सजिलै देख्न सकिने भएका कारण नयाँ वर्षमा घुम्न जानेहरुका लागि यहाँ पनि विशेष हुनसक्छ ।

जीपलाइन:  काठमाडौंबाट ३३ किलोमिटर दूरीमा धुलिखेलको थाक्लेडाँडा छ । पछिल्लो समय यो डाँडाले आन्तरिक र बाह्य पर्यटक तानिरहेको छ । साहसिक खेल जीपलाईन खेल्न जानेहरुले यहाँ हावामा उडेर छुट्टै आनन्दको अनुभूति गर्छन् ।

यो खेलमा फलामले लठ्ठामा घिर्नीको सहयताले विशेष फित्तामा झुन्डिएर उडे जसरी अघि बढिन्छ ।  साहसिक खेल जीपलाइन तीन तरिकाले खेल्न सकिन्छ । क्लासिक जीपलाईन (एकल), कपल्स जीपलाइन (जोडी), सुपरम्यान जीपलाइन (सुतेर) यी खेलको मज्जा लिन सकिन्छ ।

काभ्रेपलाञ्चोकको धुलिखेल नगरपालिका–८ थाक्लेडाँडादेखि पाँचखाल नगरपालिका–५ खाँवासम्म ११ सय मिटरको दुरीमा जीपलाइनमा रमाउन पाइन्छ । हावामा उडिरहँदा अन्नपुर्ण, गणेश, लाङटाङ, फूर्बीच्याचु लगायतका हिमशृंश्रखलाको दृश्यावलोकन गर्न सकिन्छ ।

नगरकोट

काठमाडौं उपत्यकाबाट छोटो दूरीमै पुग्न सकिने प्रसिद्ध रमणीय स्थल हो–नगरकोट । राजधानी काठमाडौंबाट ३२ किलोमिटर उत्तरपूर्व र भक्तपुरबाट २० किलोमिटर पूर्वमा पर्दछ ।

हिमालको काखबाट निस्कने सूर्योदयको दृश्यवलोकनका लागि पनि प्रसिद्ध मानिन्छ– नगरकोट । समुन्द्री सतहबाट २ हजार ७५ मिटर उचाईमा रहेको नगरकोट गर्मी मौसममा पनि चिसो नै हुन्छ । नगरकोटबाट विभिन्न मनमोहक हिमश्रृंखला देख्न सकिन्छ ।

नगरकोटबाट धौलागिरि, कञ्चनजंघा हिमश्रृंखलाका मनास्लु, गणेश, लाङटाङ, गौरीशंकर, ल्होत्सेलगायतका हिमाल देखिन्छ । नगरकोट घुम्न जानेहरुका लागि नगरकोटमा खानपिनको लागि स–साना होटल देखि ठूला रेष्टुरेन्टहरुको पनि राम्रो व्यवस्था छ ।

नगरकोट जानका लागि रत्नपार्कबाट भक्तपुरसम्मको बसमा जान सकिन्छ । भक्तपुर बसपार्कबाट नगरकोट जाने बस पाइन्छ । बस भक्तपुरको कमलविनायक हुँदै १ घण्टाको अवधिमा नगरकोट पुग्छ ।

भोटेचौर

सिन्धुपाल्चोकको भोटेचौर गाँउपालिका अन्तर्गत पर्ने चिया बगान ‘मिनी इलाम’ नामले परिचित छ । काठमाडौंबाट ३८ किलोमिटर दूरीमा रहेको भोटेचौर प्राकृतिक सौन्दर्यतामा रमाउने र फोटो खिचेर आनन्द लिनेहरुका लागि प्रमुख गन्तव्य बन्न सक्छ ।

काठमाडौंको चावहिलबाट भोटेचौर जाने बस पाइन्छ । २ घण्टाको फरकमा भोटेचौर पुगिन्छ । भोटेचौरमा सुविधासम्पन्न होटलहरु छन् ।

चित्लाङ

मकवानपुरकोे चित्लाङ पनि घुम्नलायक र रमणीय स्थलका रुपमा परिचित छ । चित्लाङ पुग्नका लागि चार वटा रुटमा सवारी चल्ने गर्छन् ।

कलंकी, चन्द्रगिरी, थानकोट हुदैँ १० किलोमिटर दूरी, काठमाडौंबाट मातातिर्थ सःखेल हुदैँ करिब २७ किलोमिटर दूरी, दक्षिणकाली फर्किङ कुलेखानी भएर जाँदा ५२ किलोमिटर दूरी र थानकोट नौविसे टिस्टुङ हुदैँ ७५ किलोमिटरको दूरीमा चित्लाङ पुग्न सकिन्छ ।

चित्लाङ ऐतिहासिक स्थल, ग्रामीण वातावरण, वनजंगलको मनोमोहक दृश्यले भरिपूर्ण छ । चित्लाङमा विश्वकै दुर्लभ र एसियामा मात्र पाइने ‘अल्पाका’ जनावर रहेका छन् । तुलसीपछि अक्सिजनमा दोस्रो मानिने ओलिभ (जैतुन) फर्म यहाँको अर्को आकर्षणको केन्द्रविन्दु हो । थुप्रै ऐतिहासिक स्थलमध्यको अशोक चैत्य पनि रहेको छ । साथमा तालका छेउमा होमस्टेहरु रहेका छन् ।

चन्द्रागिरी

२ हजार ४ सय ७५ मिटर उचाईमा रहेको चन्द्रागिरी काठमाडौंको रमणीय स्थलका रुपमा चर्चित छ । चन्द्रागिरी जानका लागि सार्वजनिक सवारी साधनको राम्रो व्यवस्था छ । रत्नपार्कबाट सिधै चन्द्रागिरी यातायात लाग्छ । त्यस्तै थानकोटको बसमा जाँदा पनि ५ मिनेट हिड्दा चन्द्रगिरी पुग्न सकिन्छ ।

चन्द्रागिरीमा केबलकारको व्यवस्था भएसँगै आन्तरिक तथा बाह्य पर्यटकको चहलपहल झन बढेको हो । नयाँ वर्षमा घुम्न जानको लागि यो ठाउँ पनि उपयुक्त हुन सक्छ ।

चन्द्रगिरी डाँडामा जानका लागि ७५० रुपैयाँमा केबलकारको टिकट लिन सकिन्छ । करिव ७ मिनेटको अवधिमा मन्दिरसम्म पुग्न सकिन्छ ।

भालेश्वर महादेवको मन्दिर, पृथ्वी नारायण शाहको शालिक, मनमोहक दृश्यावलोकन गर्न पाइने भ्यू टावर, होटलको व्यवस्था छ । साथमा बालबालिकाहरुका लागि फनपार्कको समेत व्यवस्था छ । चन्द्रगिरीबाट विभिन्न हिमालहरुको दृश्यावलोकन गर्न सकिन्छ ।

मनकामना मन्दिर

गोरखाको मनकामना मन्दिर पनि नयाँ वर्षमा घुम्न जानका लागि उपयुक्त स्थान हुनसक्छ । काठमाडौंबाट करिव ९० किलोमिटरको बसको यात्रापछि कुरिनटार पुगिन्छ ।

जहाँबाट मनकामनाका लागि केबलकारको व्यवस्था छ । हिडेर जानेहरुका लागि गारोटे बाटोको पनि छ तर उकालो बाटोको कष्ट व्यहोर्नुपर्छ ।

मनकामना मन्दिरु दर्शन गर्नाले मनले चिताएको पूरा हुने विश्वास राखिन्छ । यहाँ देश–विदेशबाट ठूलो संख्यामा श्रद्धालु भक्तजन आउने गर्छन् ।

सौराहा

घुम्न जानेहरुका लागि अर्को आकर्षक गन्तव्य साैराहा पनि हुन सक्छ । चितवनको सौराहा क्षेत्र वनजंगलले भरिएको छ । नेपालको आकर्षक पर्यटकीय गन्तव्यका रुपमा रहेको सौराहा चितवन राष्ट्रिय निकुञ्जमा पर्दछ । यहाँ हात्ती चढेर जंगल घुम्न पाउनु, वन्यजन्तु हेर्न, राप्ती नदीमा डुंगा सयर गर्नु र सूर्यास्त हेर्नु सौराहाका आर्कषण हुन् ।

आन्तरिक तथा बाह्य पर्यटकको केन्द्रविन्दूका रुपमा परिचित स्थान हो सौराह । सो निकुञ्ज वरीपरि वनजंगल अवलोकन गर्न हात्तीमाथि चढ्न पाइन्छ भने १२५० रुपैयाँ शुल्क लाग्नेछ ।

राति वास बस्नका लागि पनि सौराहा क्षेत्रमा राम्रा होटलहरु छन् । यसका साथै थारु सँस्कृतिको नाच हेर्न पाइन्छ ।
अहिले मुग्लिन चितवन सडक खण्डको अवस्था राम्रो भएका कारण काठमाडौंबाट चितवन पुग्न ३ देखि ४ घण्टामा पुग्न सकिन्छ।

-khabarhub

Write your Comment