बालुवाटारको जग्गा धितोमा राखेर बैंकबाट ऋण, बैंकहरुको ३० अर्ब संकटमा !

रातोघर

 १६ बैशाख २०७६, सोमबार ०७:३६  मा प्रकाशित
३३३ पाठक संख्या



काठमाडौं

सोमबार आज प्रकाशित नयाँ पत्रिका दैनिकले पहिलो पृष्ठमा ललितानिवासको सरकारी जग्ग ४१७ कित्तामा दुक्रिएको र थप टुक्रा खोजिमा मालपोत कार्यालय रहेको बारेको समाचार प्रकाशन गरेको छ ।

बालुवाटारको जग्गा धितामा, बैंकको ३० अर्ब संकटमा शीर्षकको समाचार आजको नयाँ पत्रिका दैनिकमा प्रकाशन भएको छ ।

समाचारमा जनाइए अनुसार व्यक्तिको नाममा पुगेको बालुवाटारको अधिकांश सरकारी जग्गा बैंकको धितोमा रहेको खुलेको छ। तीव्रगतिमा किनबेच हुँदा सो जग्गा अहिलेसम्म कम्तीमा ३३४ कित्तामा चिरा पारिएको छ। जग्गाधनीहरूले विभिन्न बैंकमा धितो राखेर करिब ३० अर्ब ऋण निकालेका छन्। सरकारले जग्गा रोक्का राखेकाले बैंकको लगानीसमेत संकटमा परेको छ।

डिल्लीबजार मालपोत कार्यालयले सो क्षेत्रको जग्गाको अभिलेख खोज्दै छ। अहिलेसम्म व्यक्तिको नाममा सारिएको ३३४ र सरकारसँग रहेको ८३ कित्ता जग्गा भेटिएको छ। मालपोतले भेटिएको जग्गा रोक्का गरेको छ भने थप जग्गा खोज्दै छ। व्यक्तिका नाममा सारिएका जग्गा रोक्का गर्ने क्रममा बैंकमा धितो राखिएको विवरण पनि खुलेको हो। ‘रोक्का गर्ने क्रममा अधिकांश जग्गा बैंकमा धितो राखेर पैसा निकालेको भेटिएको छ,’ मालपोत स्रोतले भन्यो, ‘यसबारे कार्यालयले मन्त्रालयलाई जानकारी गराइसकेको छ।’

भूमाफिया आफैँले र उनीहरुमार्फत जग्गा किनेका जग्गाधनीले विभिन्न वाणिज्य बैंकबाट ऋण लिएका छन्। ठूलो रकम इन्भेस्टमेन्ट बैंक, नबिल बैंक, प्रभु बैंक, सिद्धार्थ बैंक, एभरेस्ट बैंक, एनआइसी एसिया बैंक र एसबिआई बैंकबाट निकालिएको मालपोत स्रोतले जनाएको छ।सरकारी जग्गा धरौटी राखेर व्यक्तिले पैसा लिएको विषयमा नेपाल राष्ट्र बैंक बेखबर छ। राष्ट्र बैंकले कति जग्गा धरौटीमा राखेर कति रकम निकालिएको छ भन्ने जानकारी नभएको बताएको छ। राष्ट्र बैंकका डेपुटी गभर्नर चिन्तामणि सिवाकोटीले अवैध जग्गा धितो राखेर ठूलो रकम ऋण दिइएको भए त्यसले वित्तीय स्थायित्वमै समस्या ल्याउने बताए।

-khabarhub

Write your Comment