गर्भवती छोरीसहित ज्वाइँलाई पनि जिउँदै जलाउने यो परिवार

मुम्बई।

एक परिवारले आफूहरुको सहमति विपरीत विवाह गरेको भन्दै छोरीसहित उनका पतिलाई जिउँदै जलाइदिएको छ ।

छोरीले अन्तरजातीय विवाह गरेको निहुँमा परिवारले यस्तो अपराध गरेको हो । यो घटना भारतीय राज्य महाराष्ट्रअन्तर्गत पर्ने अहमदनगरको हो ।

इन्डियन एक्सप्रेसको समाचारका अनुसार जिउमा आगो लगाइएकी १९ वर्षीया रुक्मिणी रणसिंहको मृत्यु भएको छ । उनका पति मंगेश रणसिंहको भने पुनेको ससून अस्पतालमा उपचार भइरहेको छ ।

युवती लोहार समुदायबाट थिइन् भने उनका पति पासी समुदायका थिए । समाचारका अनुसार जिउमा आगो लगाएर मृत्यु भएकी रुक्मिणी २ महिनाकी गर्भवती थिइन् ।

पति–पत्नीलाई जिउँदै जलाउने रुक्मिणीका दुई काका सुरेन्द्र भारतीय र घनश्याम सरोजलाई प्रहरीले गिरफ्तार गरिसकेको जनाइएको छ । रुक्मिणीका पिता राम भारतीय भने फरार छन् ।

प्रहरीका अनुसार यो घटना १ मे परनार इलाकाको निधोइ गाउँमा भएको थियो । रुक्मिणीले अघिल्लो वर्षको अक्टुबर महिनामा विवाह गरेकी थिइन् ।