बारा र पर्साका आँधीहुरी पीडितका लागि प्रदेश १ ले दियो एक करोड

रातोघर

 ३० बैशाख २०७६, सोमबार १७:०१  मा प्रकाशित
१७६ पाठक संख्या



जनकपुरधाम ।

गत चैत महिनामा बारा र पर्सामा आएको विनाशकारी आँधी पीडितका लागि प्रदेश १ सरकारले घोषणा गरेको एक करोड सहयोगको चेक सोमबार हस्तान्तरण गरेको छ ।

प्रदेश १ का मुख्यमन्त्री शेरधन राई आफैं सोमबार प्रदेश २ को अस्थायी मुकाम जनकपुरधाम आएर उक्त सहयोग हस्तान्तरण गरेका हुन् । उनले प्रदेश २ का मुख्यमन्त्री लालबाबु राउतलाई एक करोडको चेक हस्तान्तरण गरे ।

मुख्यमन्त्री तथा मन्त्रिपरिषदको कार्यालयमा आयोजित कार्यक्रममा राईले चेक हस्तान्तरण गर्दै आँधीले निम्त्याएको विपदमा आफ्नो प्रदेशले सानो सहयोग गरेर प्रदेश २ को विपतमा सबै एकजुट रहेको सन्देश दिएको बताए ।

चेक बुझ्दै प्रदेश २ का मुख्यमन्त्री राउतले प्रदेश १ प्रति आभार प्रकट गरे । उनले मुलुक संघीयतामा गएपछि प्रदेश प्रदेश बीचको सहकार्य र सम्बन्धमा मजबुत बनाउने आधार प्रारम्भ भएको उल्लेख गरे ।

चैत्र १७ गते बारा पर्सामा आएको भीषण हावाहुरीमा परि २९ जनाको ज्यान गएको थियो भने सयौं मान्छे घाइते भएका थिए । यस्तै करोडौँ रुपैयाँ बराबर धनमालको क्षति भएको थियो ।

आँधी पीडितका लागि प्रदेश ३ सरकारले पनि एक करोड सहयोग उपलब्ध गराइसकेको छ भने अन्य प्रदेश सरकारले पनि सहयोग गर्ने निर्णय गरेका छन् ।

Write your Comment