सिमरामा ग्रासरुट फुटबलको ‘क्रेज’

रातोघर

 १ जेष्ठ २०७६, बुधबार २०:०५  मा प्रकाशित
३६० पाठक संख्या



सिमरा।

नेपाली फूटवलको विकासका लागि अखिल नेपाल फुटबल संघ (एन्फा) ले सुरु गरेको ‘ग्रासरुट’ फुटबलमा बालबालिकाको रुची बढ्न थालेको छ ।
जिल्ला फूटवल संघ बाराले सिमरामा सञ्चालन गरिरहेको अभ्यास चरणको दोस्रो हप्तामै विद्यालयका बालबालिकाले उत्साहजनक सहभागीता देखाएका छन् ।
सिमरा रंगशालामा शनिवार बिहान झण्डै दुई सय बालबालिका उपस्थित हुदा जिल्ला फूटवल संघका पदाधिकारी समेत उत्साहित देखिन्थे । रंगशालामा बालिबालिका मात्र नभई उनका अभिभावक समेत उपस्थित भए ।

आफ्ना सन्तानलाई लिएर रंगशाला पुगेका अभिभावकलले फूटबल अभ्यासमा बालबालिकाको हौसला बढाएको दृश्य हेर्न लायक थियो । सिमराका विरेन्द्र वाईवाले एन्फाको यो कार्यक्रमले फूटवलको बिकाससंगै साना बालबालिकालाई स्वस्थ र कुलतमुक्त राख्न महत्वपूर्ण भूमिका खेल्ने बताए ।
स्कुले बालबालिकालाई फूटवलमा सहभागी गराउने र दक्ष खेलाडी उत्पादन गर्ने एन्फाको चार वर्षे यो कार्यक्रममा बाराका १६ विद्यालयका झण्डै दुई सय बालबालिका सहभागी छन् । ग्रास रुट फूटवल कार्यक्रमका संयोजक एवम् जिल्ला फूटवल संघका बरिष्ठ उपाध्यक्ष रामचन्द्र लामाले सोचेभन्दा बढी बालबालिकाको सहभागीताले आफूहरु समेत उत्साहित भएको बताए ।

ग्रासरुट फूटवलको अभ्यासमा अहिले आठ बर्षदेखी १३ बर्षसम्मका बालबालिकालाई सहभागी गराइएको लामाले बताए । चार वर्षसम्म सञ्चालन हुने कार्यक्रमको अहिले अभ्यास भईरहेको र औपचारिक रुपमा उद्घाटन गर्न बाकी रहेको लामाको भनाई छ । लामाले ग्रासरुट फूटवलको औपचारिक उद्घाटनका लागि सहभागी बालबालिकालाई बिशेष अभ्यास गराईरहेको जानकारी दिए ।

ग्रासरुट फूटवलको प्रशिक्षणका लागि जिल्ला फूटवल संघले कृष्णमणी चौधरीलाई प्रशिक्षक तोकेको छ । चौधरीसहित जिल्ला फूटवल संघका १० जना भन्दा बढी प्रतिनिधिले अहिले अभ्यास गराईरहेका छन् । कार्यक्रमको औपचारिक सुरुवातपछि प्रत्येक विद्यालयमा ६ दिनसम्म प्रशिक्षक पुगेर प्रशिक्षण गराउने र सातौ दिन सिमरा रंगशालामा लिग सञ्चालन गर्ने योजना रहेको प्रशिक्षक चौधरीले बताए ।

एन्फाले यो कार्यक्रम सञ्चालन गर्नका लागि यस वर्ष पाच लाख बजेट उपलब्ध गराएको छ । एन्फाले पठाएको बजेटबाट सिमरा रंगशालामा दुई वटा चेन्जिङ रुम बनाएको लामाले बताए । चार बर्षे कार्यक्रम अघि बढाउन पूर्वाधार अति आवश्यक रहेको त्यसका लागि चेन्जिङ रुम बनाइएको लामाको भनाई छ ।
फूटवलको उर्वर भूमिको रुपमा रहेको जिल्लाको उत्तरी क्षेत्रमा टेक्नीकल सेन्टर अति आवश्यक रहेको भन्दै एन्फासंग पहल भईरहेको लामाले बताए ।

Write your Comment