कीर्तिपुरमा बन्यो काठमाडौंकै पहिलो ‘प्लास्टिक सडक’

रातोघर

 ३ जेष्ठ २०७६, शुक्रबार २०:२२  मा प्रकाशित
१८३ पाठक संख्या



काठमाडौं ।

एक वर्षदेखि धूलाम्मे र खाल्डाखुल्डीले अस्तव्यस्त कीर्तिपुर, नयाँ बजार सडक बुधबार कालोपत्रे गरियो। अब यो काठमाडौं उपत्यकाकै विशेष सडक बनेको छ।

विशेष हुनुको कारण- यहाँको कालोपत्रेमा अलकत्रा र गिटीबालुवासँगै चाउचाउ, बिस्कुट, पराग, चक्लेट लगायत विभिन्न ‘जंकफुड’ का प्लास्टिक खोलसमेत मिसिएका छन्।

सहर प्रदूषित पार्ने यी प्लास्टिक खोल बटुलेर, मेसिनले टुक्राटुक्रा पारेर, पगालेर, अलकत्रा र गिटीबालुवासँग मिसाएर सडक कालोपत्रे गरिएको हो।

‘प्लास्टिक सडक’ बनाउने अभियान पोखराबाट सुरू भएको थियो। पोखराका दुई युवा इञ्जिनियर र केही व्यवसायीले नौ महिनाअघि नेपालमै पहिलोपटक ‘प्लास्टिक सडक’ बनाएका थिए।

कीर्तिपुरका मेयर रमेश महर्जनले त्यही प्रविधि नयाँ सडकमा लागू गर्न पोखरेली समूहसँग सम्पर्क गरे। त्यसमा मेकानिकल इञ्जिनियर विमल बास्तोला, सिभिल इञ्जिनियर राजीव सुवेदीसहित सञ्जीव बास्तोला, अजय केसी र निराजन घिमिरे छन्। उनीहरू ‘ग्रिन रोड वेस्ट म्यानेजमेन्ट’ कम्पनीमार्फत् काम गरिरहेका छन्।

‘उहाँहरूलाई डाकेर सिधै काम लगाउन नमिलेपछि हामीले उपभोक्ता समिति गठन गर्यौं,’ मेयर महर्जनले सेतोपाटीसँग भने, ‘समितिले सामान्य सडकमा जस्तै बजेट बनाएर काम सुरू गर्यो।’

करिब दुई सय मिटरको नयाँ बजार सडकमा पाँचदेखि बाह्र प्रतिशत प्लास्टिक मिसाइएको छ। मेकानिकल इञ्जिनियर विमलका अनुसार ६ सय किलो प्लास्टिक खोल प्रयोग भएका छन्।

-setopati

Write your Comment