भिडियो गेमलाई ‘रोग’ भनी परिभाषित गर्ने डब्लुएचओको तयारी

रातोघर

 ५ जेष्ठ २०७६, आईतवार २१:३४  मा प्रकाशित

अमेरिका ।

प्रविधिको विकाससँगै मानिसहरु भिडियो गेमको लतमा फस्दै गइरहेका छन् । नेपालमै पनि हालैमात्र पब्जी नामक भिडियो गेमलाई प्रतिबन्ध लगाइएको थियो । यद्यपि पछि भने त्यो फिर्ता लिइएको थियो ।

भिडियो गेमको लतमा बालबालिका मात्रै होइन, युवावर्गका मानिसहरु पनि फस्दै आएका छन् । मानिसहरु आफ्नो काम नै त्यागेर भिडियो गेममै झुण्डिने गरेकाले उनीहरुलाई समाजमा घुलमिल हुन समेत अफ्ठ्यारो पर्ने गरेको समाचार पनि आउने गरेका छन् ।

विश्व स्वास्थ्य संगठन डब्लुएचओले भने अब भिडियो गेमको लतलाई औपचारिक रुपमै ‘रोग’ भनी परिभाषित गर्ने भएको छ । भिडियो गेमको लतले मानिसको दैनिक जीवनलाई नै असर पार्ने भएकाले यस्तोलाई डब्लुएचओले ‘रोग’ कै रुपमा परिभाषित गर्न लागेको हो ।

यसअघि गत जुन महिनामा डब्लुएचओले भिडियो गेमलाई स्वास्थ्यसम्बन्धी ‘विकार’ का रुपमा परिभाषित गरेको थियो । भिडियो गेमको लतलाई रोगका रुपमा परिभाषित गर्ने वा नगर्ने विषयमा आगामी साता डब्लुएचओमा मतदान हुने बताइएको छ ।

यता भिडियो गेमका निर्माताहरुले भने भिडियो गेमको लतलाई समस्याका रुपमा स्वीकार्दै यसबारे थप कदम चाल्न तयार रहेको जनाएका छन । हालै माइक्रोसफ्ट कम्पनीले केटाकेटीलाई भिडियो गेमको लत नलागोस् भन्नाका लागि अभिभावकलाई भिडियो गेमको नियन्त्रण गर्ने अधिकार दिनेगरी प्राविधिक विकास गर्न लागेको जनाएको थियो ।

त्यसबाहेक भिडियो गेममा हुने हिंसा, आक्रमकता र अन्य गतिविधीले बालबालिका र युवावर्गका मानिसहरुलाई अझ हिंसात्मक बनाउँदै लगेको बारे पनि चिन्ताहरु उत्पन्न हुँदै आएका छन् ।

भिडियो गेमको लतबाट मानिसहरु समाजमा घुलमिल नहुने र यसबाट उनीहरु डिप्रसन र अन्य मानसिक रोगको शिकार समेत हुने गरेको बताइन्छ ।

-khabarhub

Write your Comment




saturday2