उपमेयर नै भूमाफियासँग मिलेको आरोप

भूमाफियाको चलखेलमा इटहरी उपमहानगरपालिकाकी उपमेयरले वडा कार्यालयलाई बाइपास गर्दै सिँचाइको स्रोत रहेको सिमसारलाई मास्नेगरी प्लटिङको जग्गा जोड्ने पुल बनाउन सिफारिस दिएको स्थानीयले आरोप लगाएका छन् । इटहरी–३ क्षेत्रभरिका लागि भुलभुले सिमसार सिँचाइको स्रोतका रूपमा रहेको छ । सोही सिमसारलाई प्रत्यक्ष असर गर्नेगरी प्लटिङको जग्गा जोड्न पुल बनाउन उपमहानगरपालिकाकी उपमेयर लक्ष्मी गौतमले सिफारिस दिएकी थिइन् ।

बीच भागमा रहेको सिमसार क्षेत्रमा कंक्रिट पुल बनाउन प्लटिङवालाले स्थानीय केही व्यक्तिलाई अघि सारेर उपमहानगरबाट सिफारिस लिएका छन् । वडा नम्बर ३ को कार्यालयले सिँचाइ मासिने भन्दै पुल बनाउन सिफारिस दिन रोकेको थियो । तर, वडा कार्यालयलाई नै बाइपास गर्दै उपमेयर गौतमले पुल बनाउन सिफारिस दिएको स्थानीय किसानले आरोप लगाएका छन् । स्थानीय कर्णबहादुर अधिकारीसहितको निवेदनका आधारमा उपमहानगरपालिकाले सिफारिस दिएको हो । वडा कार्यालयले सिफारिस दिन नमानेपछि प्लटिङवाला केही व्यक्तिको धनीपूर्जा समेत देखाई सिफारिस लिएका छन् ।

वडा कार्यालय, पैनी समिति र स्थानीयसँग छलफल नै नगरी एकैपटक उपमहानगरपालिकाले मनोमानी ढंगले सिफारिस दिएको स्थानीय किसान खगेन्द्र सुवेदीले बताए । भुलभुले पानी उम्रने सिमसार करिब १ किलोमिटरमाथि जंगलसम्म जोडिएको छ । यहाँका किसानले २०१२÷१३ सालदेखि सोही सिमसारको पानी सिँचाइका रूपमा प्रयोग गर्दै आएका छन् ।

करिब १ हजार ३ सय बिघा क्षेत्रमा सिँचाइलाई पानी जाने गरेको स्थानीय तथा बुढी पटेरुवा जलउपभोक्ता समितिका अध्यक्ष कमलबहादुर महतले जानकारी दिए । पुल बनाए ढुंगा, गिट्टीलगायतका कंक्रिटले सिमसार मासिने भन्दै त्यो बन्न नदिने अध्यक्ष महतले बताए । सोही पानीको सिँचाइले यहाँ दुई बाली धान खेती, मकै, गहुँलगायतका बाली किसानले लगाउँदै आएका छन् । तर, सिँचाइको मुटु रहेको सिमसारलाई नै मास्न षड्यन्त्र भइरहेको जलउपभोक्ता समितिका सचिव कालिबहादुर लिम्बुको भनाइ छ । पैनी समितिले पुल बनाउन नदिने भर्खरै निर्णय गरेको उनले जनाए ।

-shilapatra