सिमराबाट पोखरा उडान सुरु हुँदै

बाराको सिमरा विमानस्थलदेखि पोखर विमानस्थलसम्म चैत्रदेखि उडान हुने भएको छ ।

यसअघि २०७६ माघ दोस्रो सातादेखि उडान सुरु गर्ने भनिए पनि स्थगित भएको थियो ।

सुरुमा साताको आइतवार, बुधवार र शुक्रबार गरी तीन दिन पोखरा–सिमरा–पोखरा उडान गर्ने पनि निर्णय भएको छ । प्रदेशमन्त्री, पोखरा महानगर, उद्योग वाणिज्य संघ, पर्यटन व्यवसायी, बाराबाट आएको जितपुर सिमरा उपमहानगरपालिकाका प्रमुख, यति एअरलाइन्स, पोखरा नागरिक उड्डयन प्राधिकरणका प्रमुखलगायत सरोकारवालाको बैठकले यस्तो निर्णय गरेको हो ।

बारा र पर्सा (वीरगञ्ज) औद्योगिक र व्यापारिक हब भएकाले हवाई सेवामार्फत पर्यटकीय गन्तव्य पोखरालाई जोड्न ढिलाइ गर्न नहुने बैठकका सहभागीको भनाइ थियो ।

आन्तरिक मात्र नभई भारतीय पर्यटकले पनि हवाई सेवाबाट लाभान्वित गर्ने उद्देश्यले सिमराबाट पोखरसम्मको उडानले महत्वपूर्ण भूमिका खेल्ने वीरगञ्जका उद्योगीहरुको बुझाइ छ । भारतको बिहार राज्यबाट पर्यटकहरु सिमरा हुँदै पोखरा जाने उद्योगीहरुले विश्वास व्यक्त गरे ।

जितपुर सिमरा उद्योग वाणिज्य संघका अध्यक्ष सञ्जयकुमार साहले सिधा हवाई उडान सेवाले पोखरा र एअरलाइन्स कम्पनीले फाइदा लिने बताए । ‘पर्यटन व्यवसायीले प्याकेज बनाएर ल्याएमा भारतीय पर्यटक पनि सजिलै पोखरा आउने वातावरण बन्छ,’ उनले भने, ‘हवाई उडानलाई नियमित गर्न सबैले सहयोग गर्नुपर्छ ।’