‘महिलाले शरीर सुम्पेपछि सिद्धबाबाले करणी गरे’

पीडित महिला भन्छिन्, ममाथि बलात्कार नै भएको हो

रातोघर

 २ फाल्गुन २०७७, आईतवार ०७:४१  मा प्रकाशित
२४७ पाठक संख्या


फागुन, विराटनगर । आफूलाई स्त्री र अग्निबाट टाढा रहने बताउँदै आएका विवादास्पद धर्मगुरु सिद्धबाबा भनिने कृष्णबहादुर गिरीले सहमतिमा करणी गरेको ठहर जिल्ला अदालत सुनसरीले गरेको छ ।

बलात्कारको आरोपमा पक्राउ परेका सिद्धबाबालाई अदालतले २२ मंसिरमा सफाइ दिएको थियो । त्यसको दुई महिनापछि तयार भएको फैसलाको पूर्णपाठमा जाहेरवाली महिलाले मोहित भएर शरीर समर्पण गरेका कारण बाबाजीले करणी गरेकाले जबरजस्ती मान्न नसकिने उल्लेख छ ।

 

७५ पृष्ठ लामो फैसलाको पूर्णपाठमा भनिएको छ, ‘जाहेरवालीलाई भेटेको समयमा जाहेरवाली प्रतिवादीसँग मोहित भई आफ्नो शरीर समर्पण गरी भएको करणी निजहरूका बीच सहमतिमा भएको भन्ने देखियो । अतः यस्तो सहमतिबाट भएको करणीलाई जबरजस्ती करणी मान्न नसकिने हुँदा प्रतिवादीउपरको अभियोग दावी स्थापित हुन आएन । तसर्थ प्रतिवादी सिद्धबाबा रामकृष्णचार्य श्री वैष्णव कृष्णदास भन्ने कृष्णबहादुर गिरीले आरोपित कसूरबाट सफाइ पाउने ठहर्छ ।’

त्रि–दण्ड धारण गरेकाले आफू स्त्री (नारी) र अग्नी (आगो) लाई नछुने बताउँदै आएका गिरीले अदालतमा पनि स्त्री र अग्नीबाट टाढा रहने वयान दिएका थिए । तर, जाहेरवाला महिलासँगको म्यासेज र अडियो सम्बादका आधारमा अदालतले सहमतिमा शारीरिक सम्पर्क राखेको ठहर गरेको हो ।

सिद्धबाबाले काठमाडौं बस्दै आएकी महिला अनुयायीलाई आश्रममा बोलाएर करणी गरेको दाबीसहित जिल्ला अदालत सुनसरीमा मुद्दा दर्ता भएको थियो । गत मंसिर २२ गते जिल्ला न्यायाधीश अर्जुनप्रसाद कोइरालाको इजलासले एक पक्षीय बहसपछि बलात्कार नठहर्ने फैसला गरेको थियो ।

बिहीबार तयार भएको पूर्ण पाठमा सिद्धबाबा र महिलाबीच सहमतिमा सम्पर्क भएको र श्रीमानले म्यासेज हेरेपछि जाहेरी परेको उल्लेख छ ।

२०७६ कात्तिक ४ गते राति सिद्धबाबाले करणी गरेको आरोपमा ३८ दिनपछि २०७६ मंसिर ११ गते जाहेरी दर्ता भएको थियो । ‘निजलाई ( पीडित महिला) डर, त्रास र अनुचित प्रभावमा पारेर प्रतिवादीले जवरजस्ती करणी गरेको र प्रतिवादीको हैसियत र समाजमा रहेको प्रभावका कारण तत्काल घटना बाहिर ल्याउन नसकेको भन्ने आशयको जाहेरवालीको भनाइ रहेको देखिन्छ’ अदालतको फैसलाको बुँदा नम्बर ६६ मा भनिएको छ ‘सिद्धबाबा भनिने प्रतिवादीले ठूलो आश्रम चलाई बसेको, निजका हजारौं अनुयायी रहेको भन्ने तथ्य मिसिलबाट उजागर भएको छ । साथै जाहेरवाली स्वय पनि प्रतिवादीले अघिसारेको धार्मिक मान्यताको भक्त वा अनुयायी भएको र निजहरु बीच एक धार्मिक गुरु र शिष्यको सम्बन्ध रहेको भन्ने देखिएको छ । जाहेरवाली र प्रतिवादीबीच आदान प्रदान भएका म्यासेजहरुबाट सहमतिमा शारीरिक सम्पर्क भएको भन्ने देखिएकाले अभियोग दाबीबमोजिम जबरजस्ती करणीको कसूर कायम गर्न मिल्ने देखिएन ।’

अदालतले पीडित महिलाले लेखेको म्यासेज, मुद्दा दर्ता भएपछि सिद्धबाबाले माफी मागेको अडियो प्रमाणलाई आधार मानेको छ ।

सामान्यता पीडित महिलाको भनाइलाई अदालतले दरिलो प्रमाणका रुपमा लिने गर्छ । पीडित महिलाले जाहेरी र बकपत्रमा पनि आफूमाथि करणी भएको वयान दिएकी थिइन् ।

तर अदालतले त्यसलाइ मानेन । अदालतको फैसलाको अन्तिम बुँदामा भनिएको छ, ‘माथि विवेचना गरिएका आधार एवं कारणहरूबाट जाहेरवालीको शारीरिक परीक्षणबाट निज उपर जबरजस्ती करणी भएको नदेखिएको, जाहेरवाली शारीरिक तथा मानसिक रूपमा स्वस्थ्य भई आफूले गरेको कार्यको असर र परिणाम बुझ्न सक्ने हैसियतमा रहेकी छन् भन्ने कुरा निजले प्रतिवादीलाई पठाएका म्यासेजबाट देखिएको तथा माथि विवेचना गरिएअनुसार निज स्वयमले नै आफूले प्रयोग गर्ने मोवाइलबाट लामो समयदेखि विभिन्न समयमा विद्युतीय माध्यमको प्रयोग गरी प्रतिवादीलाई आशक्तिपूर्ण र अनुनयजन्य सन्देशहरू प्रवाह गरी भेटघाटको मौका उपलब्ध गराउन गरेको अनुनयअनुरूप जाहेरवालीलाई भेटेको समयमा जाहेरवाली प्रतिवादीसँग मोहित भई आफ्नो शरीर समर्पण गरी भएको करणी निजहरूका बीच सहमतिमा भएको भन्ने देखियो । अतः यस्तो सहमतिबाट भएको करणीलाई जबरजस्ती करणी मान्न नसकिने हुँदा प्रतिवादीउपरको अभियोग दावी स्थापित हुन आएन । तसर्थ प्रतिवादी सिद्धबाबा रामकृष्णचार्य श्री वैष्णव कृष्णदास भन्ने कृष्णबहादुर गिरीले आरोपित कसूरबाट सफाइ पाउने ठहर्छ ।’

पीडित महिलाले भने न्यायालयबाट नै आफूलाई अन्याय भएको बताएकी छिन् । ‘सहमतिमा सम्पर्क भएको भए गुपचुप राख्थें, पैसाका लागि भएको भए १० करोड दिन्छु, बकपत्र बिगार भनेका थिए,’ अनलाइनखबरसँग महिलाले भनिन् ‘बलात्कारीलाई कारवाही भएन भने आवाज उठाउने कोही हुने छैनन् भोलिका दिनमा ।’

गिरीले आफूतर्फ सम्मोहन (आर्कषण) गराएर करणी गरेको र विरोध गर्दा बर्वाद हुने धम्की बारम्बार दिइरहेको बताइन् ।

 

Write your Comment