जीतपुरसिमरा वाणिज्य संघद्धारा करदाता शिक्षा कार्यक्रम आयोजना

सिमरा ।

जीतपुरसिमरा नगर उद्योग वाणिज्य संघले मातहतमा रहेका उद्योग तथा व्यवसायीहरुलाई कर शिक्षा सम्वन्धी तालिमको आयोजना गरेको छ । संघले आफ्नो सभाहलमा एक कार्यक्रमको आयोजना गरी कर शिक्षा कार्यक्रम संचालन गरेको हो ।

व्यवसायी तथा उद्योगीहरुलाई कर तथा राजस्व सम्वन्धी जानकारी र आन्तरिक राजश्व कार्यालयमा वुझाउनुपर्ने कागजात चुस्तदुरुस्त राख्ने सम्वन्धी जानकारी दिइएको छ ।

कार्यक्रममा आन्तरिक राजश्व कार्यालय सिमराका प्रमुख राजकुमार खतिवडाले उद्योगी तथा व्यवसायीहरुलाई करको दायरा र राजश्व समयमै तिर्दा हुने फाइदा र वेफाइदाहरु बारे जानकारी गराएका थिए ।

कार्यक्रमका प्रमुख अतिथी समेत रहेका खतिवडाले कुनैपनी व्यवसायी र उद्योगीहरुलाई कार्यालयले दुःख दिने मनसाय कहिले नराख्ने भन्दै अति सामान्य कुरामा ध्यान नदिँदा पछी ठुलो समस्या आइपर्ने भएकाले राज्यलाई कर तिर्न ठिलासुस्ती गर्न नहुने धारण राखे ।

कार्यक्रममा कार्यालयका कर अधिकृत पप्पु कुमार गुप्ताले सहभागीहरुलाई प्रशिक्षण दिएका हुन् ।

कार्यक्रम वाणिज्य संघका अध्यक्ष मोहन शर्मा लामिछानेको सभापतित्वमा सम्पन्न भएको हो । कार्यक्रममा बोल्दै लामिछानेले कर कार्यालय र उद्योग व्यवसायीको सम्वन्ध सुमधुर हुनुपर्ने बताए ।

उनले कुनैपनी व्यवसाय संचालन गर्नुअघि कर कार्यालयमा दर्ता भईमात्र गनुपर्ने भन्दै आर्थिक मन्दिका बिच व्यवसायमा नकारात्मक असर परेको अवस्थाले अनुगमनलाई जरिवानामा मात्रै केन्द्रित नगर्नहुन कार्यालयलाई ध्यानाकर्षण समेत गराएका छन् ।

कार्यक्रममा नगर उद्योग वाणिज्य संघ मातहतका बिभिन्न वस्तुगत समितीहरुको नेतृत्व सहित करिव २ सय स्थानिय व्यवसायी तथा उद्योगीहरुको उपस्थिती रहेको थियो ।

कार्यक्रमको सहजीकरण संघका महासचिव प्रकास गिरीले गरेका थिएभने संघका वरिष्ठ उपाध्यक्ष मनोज गुप्ताले धन्यवाद ज्ञापन गरेका थिए ।