कांग्रेस केन्द्रीय सदस्यमा मेघा शाहीको उम्मेदवारी, संगठन सुदृढीकरण र युवा पुस्ताको सहभागितामा जोड

कांग्रेसको १५औँ महाधिवेशन असोज १६ देखि १९ गतेसम्म काठमाडौंमा सम्पन्न हुने गरी निर्वाचन कार्यतालिका सार्वजनिक भइसकेको छ।शाहीले ठाकुराम क्याम्पसबाट नेपाल विद्यार्थी संघको राजनीतिमार्फत आफ्नो राजनीतिक यात्रा सुरु गरेकी हुन्। विद्यार्थी राजनीतिबाट जिल्ला कार्यसमितिमा पुगेकी उनी पछि नेपाल विद्यार्थी संघको केन्द्रीय सदस्यसमेत भइन्। त्यसपछि नेपाली कांग्रेसबाट जीतपुरसिमरा उपमहानगरपालिकाको उपप्रमुख पदमा प्रत्याशी बनेर स्थानीय निर्वाचनमा समेत राजनीतिक प्रतिस्पर्धा गरेकी थिइन्।

पार्टी संगठनसँगै सामाजिक तथा राजनीतिक क्षेत्रमा सक्रिय रहँदै आएकी शाही अहिले नेपाली कांग्रेसको केन्द्रीय तहमा आफ्नो भूमिका विस्तार गर्ने तयारीमा छिन्। पछिल्लो समय बारा जिल्लाबाट महाधिवेशन प्रतिनिधि बनेका युवा नेताहरूमा मेघा शाहीको नाम पनि केन्द्रीय सदस्यका आकांक्षीका रूपमा सार्वजनिक भएको छ।शैक्षिक रूपमा समेत सक्रिय शाहीले शिक्षामा मास्टर्स, एलएलबी, पोलिटिकल साइन्स र एमफिलसम्मको अध्ययन पूरा गरेकी छन् भने हाल पीएचडीको तयारीमा रहेको बताएकी छन्। राजनीतिक अनुभव र शैक्षिक पृष्ठभूमिलाई पार्टी संगठन निर्माणसँग जोड्ने उनको योजना छ।

उम्मेदवारी घोषणा गर्दै शाहीले आफ्नो उम्मेदवारी केवल एउटा पद प्राप्त गर्ने उद्देश्यमा सीमित नभएको बताएकी छन्। संगठन सुदृढीकरण, युवा पुस्ताको अर्थपूर्ण सहभागिता, महिलाको नेतृत्व विकास तथा नयाँ पुस्ताको आवाजलाई पार्टीको केन्द्रीय तहसम्म मजबुत रूपमा स्थापित गर्ने संकल्पसहित आफू अघि बढेको उनको भनाइ छ।उनले आफ्नो राजनीतिक यात्रा वर्षौंदेखि पार्टी संगठन, लोकतान्त्रिक मूल्य–मान्यता र जनताको भावनासँग जोडिँदै अघि बढेको उल्लेख गर्दै अब त्यसलाई थप फराकिलो जिम्मेवारीमा रूपान्तरण गर्ने उद्देश्य रहेको बताएकी छन्।

शाहीले कांग्रेसलाई अझ संगठित, समावेशी, ऊर्जाशील र जनमुखी बनाउने लक्ष्यसहित महिला केन्द्रीय सदस्य पदमा उम्मेदवारी दिएको बताएकी छन्। साथै उनले पार्टीभित्र एकता, सहकार्य र पुस्तान्तरणमार्फत नयाँ कांग्रेस निर्माण गर्नुपर्नेमा जोड दिएकी छन्।उनले आफ्नो उम्मेदवारीका लागि महाधिवेशन प्रतिनिधि तथा कांग्रेसजनबाट साथ, विश्वास र अमूल्य मतको अपेक्षा गरेको बताएकी छन्।“मेरो उम्मेदवारी केवल एउटा पदका लागि होइन, संगठन सुदृढीकरण, युवा पुस्ताको अर्थपूर्ण सहभागिता, महिलाको नेतृत्व र नयाँ पुस्ताको आवाजलाई पार्टीको केन्द्रीय तहसम्म मजबुत रूपमा स्थापित गर्ने संकल्प हो,” शाहीको भनाइ छ।