जीतपुरसिमरा उपमहानगर मातहतको व्यापारीक सटर भाडा पाँच वर्षदेखी उठ्न बाँकी, असार मसान्तसम्म दाखिला गर्न निर्देशन

सिमरा ।बाराको जीतपुरसिमरा उपमहानगरपालीका मातहतमा रहेको व्यवसायीक सटर भाडा उठाउन नगरपालीकाले ताकेता गरेको छ । बिगत पाँच वर्षदेखी उपमहानगर मातहतका सटरहरुको भाडा बक्यौता देखिएको छ ।

जीतपुरको गुदरी बजार, मीना बजार लगाएतका सटरहरुमा व्यवसायीले पाँच वर्षदेखीको सटर भाडा तिरेका छैनन् । कतिपय पुराना व्यवसायीले साविक स्थानिय निकाय भएदेखीनै सटरमा व्यवसाय संचालन गर्दै आइरहेका छन् ।

नगरपालीकाले मंगलबार अन्तिम ताकेता पत्र जारी गरी २०८० असार मसान्तसम्मको अन्तिम म्याद दिएको छ । अव उनीहरु नयाँ ब्यवस्थाबाट सटर भाडामा लिनुपर्ने वा नविकरण गनुपर्ने भएको हो ।

उपमहानगरको आर्थिक ऐन २०७९ को अनुसुची १० मा भएको ब्यवस्था अनुसार बढेको भाडा दर अनुसार व्यवसायीलाई रकम दाखिला गर्न निर्देशन दिएको छ ।
नगरले मातहतमा रहेका सवै सटरहरुलाई घरबहाल निर्देशिका २०७९ बमोजिम सटर बहालको सम्झौता गर्न समेत आग्रह गरेको छ ।

नगरले स्थानिय कर र आयस्रोतको दायरा फराकिलो बनाउने अभियान स्वरुप बिभिन्न शिर्षकका उठ्न बाँकी रकमहरुको खोजी गर्न थालेको छ ।

नगर उद्योग वाणिज्य संघको सटर भाडा सहुलियत गर्न ध्यानाकर्षण

यसैबिच नगर उद्योग वाणिज्य संघ, जीतपुरले वक्यौता सटर भाडा तिर्ने समयसिमा ६ महिना कायम गर्न आग्रह गरेको छ । कोरोना समयको व्यापार घाटा र आर्थिक मन्दीको कारण देखाउँदै संगले अहिले वक्यौता सटर भाडा नलिन र सहुलियत मुल्य कायम गरि भाडा असुली गर्न आग्रह गरेको छ ।

संघको अध्यक्ष मोहन शर्मा लामिछाने सहित कार्य समिती परिवारले नगर प्रमुखलाई ध्यानाकर्षण पत्र बुझाउँदै बिभिन्न ३ बुदामा आफ्ना मागहरु प्रस्तुत गरेको छ ।

करको दायरालाई वैज्ञानिक तवरबाट लिन आग्रह गर्दै संघले बजार र फोहर व्यवस्थापनमा ध्यान पुर्याउन आग्रह गरेको छ ।