गाईभैसी थुनेलो उपचारको औषधी सहितका सामाग्री निःशुल्क वितरण

बारा
प्रधानमन्त्री कृषि आधुनिकीकरण परियोजना, परियोजना कार्यान्वयन ईकाई बाराले ब्यवसायिक पशु फार्ममा थुनेलो रोग रोकथामका लागि टिट डिपिङ्ग अन्तरगत ३३ जना किसानलाई औषधी सहितका उपचार सामाग्री निःशुल्क वितरण गरेको छ ।

सुक्रबार जितपुरसिमरा उपमहानगरपालिका–१८, स्थीत रहेको साना किसान कृषि सहकारी संस्थामा आवद्ध पशु फार्म संचालन गरिरहेका किसानहरुलाई बेटाडिन, मास्ट मलम, गिलसिरिन र गाईभैसीको थुन उपचारमा सहयोगी डिप कप वितरण गरेको हो ।

औषधी सहितको सामाग्री वितरण अघि उपचार तथा कप प्रयोग विधि सहित थुनेलो रोगका लक्ष्यण, यसका असर सहित रोग लाग्न नदिन उपायका विषयमा प्रशिक्षण पनि गरिएको थियो ।

जीतपुरसिमरा र कलैयाका पशुपालन फार्म संचालक किसानहरुलाई प्रधानमन्त्री कृषि आधुनिकीकरण परियोजना, परियोजना कार्यान्वयन ईकाई बाराका छोटेबाबु प्रसाद यादव,प्रमोद कुमार राम,राजकिशोर यादव र इर्साद अंसारीले सहजीकरण र उपचार सामाग्री वितरण गरेका थिए ।

पछिल्लो समय विशेषगरी गाईमा र भैसीमा यो रोगको प्रकोप बढिरहेको पाईएको छ । रोगका कारण दुध उत्पदनमा कमि हुने र पशुको स्वास्थ्यमा समेत गम्भीर असर पर्दा किसानको लगानी ढुब्ने गरेको छ ।

दुहुनो गाई भैसिको सरसफाईमा किसानको लापरवाही सँगै अज्ञानताका कारण हुने संक्रमणबाट यो रोग लाग्ने गरेको छ । लामो समय लगाएर उपचारमा मोटो रकम खचिनु पर्ने भएकाले रोग लाग्नै नदिन सरकारले सहयोग गरेको परियोजना ईकाई बाराका पशु प्राविधिक प्रमोद कुमार रामले बताए ।

कार्यक्रममा साना किसान कृषि सहकारी संस्थाका अध्यक्ष नयनकला खड्का, संचालक संचराम थिङ्ग , कृषि प्राविधिक जलेन्द्र चौधरी, महिला सहायक चमेली लोप्चन लगायतको समेत सहभागिता थियो ।