काठमाडौं । देशको बढ्दो राजनीतिक संकटबीच आज सरकारले प्रमुख दलहरूलाई समेट्दै त्रिपक्षीय बैठकको आह्वान गरेको छ। प्रधानमन्त्री सुशीला कार्कीको पहलमा बोलाइएको बैठकमा मुख्य दलका शीर्ष नेताहरूको उपस्थिति रहने भएको छ।
यसबीच, पूर्वप्रधानमन्त्री तथा नेकपा (एमाले) अध्यक्ष केपी शर्मा ओलीले वर्तमान राजनीतिक गतिरोध अन्त्य गर्न विस्तृत ‘मार्गचित्र’ सार्वजनिक गरेका छन्। उनले असंवैधानिक रूपमा विघटित प्रतिनिधिसभा पुनःस्थापना गर्नुपर्ने माग गर्दै संविधान संशोधनमार्फत संसद् सदस्य नभएको व्यक्ति पनि दलहरूको सहमतिमा प्रधानमन्त्री बन्न सक्ने कानुनी व्यवस्था गर्न सुझाव दिएका छन्।
ओलीले उक्त सरकारमा आफू प्रधानमन्त्री नबन्ने घोषणा गर्दै युवा आन्दोलनमा सक्रिय Gen Z समूह सहितको सर्वदलीय सहमतिको सरकार गठन गर्नुपर्ने प्रस्ताव अघि सारेका छन्। साथै, उनले तीन महिनाभित्र, फागुन २१ गते नयाँ निर्वाचन सम्पन्न गर्नुपर्ने स्पष्ट समयसीमा पनि प्रस्तुत गरेका छन्।
राजनीतिक वृत्तका अनुसार, ओलीको यो प्रस्तावले चलिरहेको शक्ति समीकरणमा नयाँ सम्भावनाको संकेत दिएको छ भने आजकै त्रिपक्षीय बैठकले आगामी सरकार गठनको दिशा तय गर्ने अपेक्षा गरिएको छ।
Write your Comment