११ देशका राजदूत फिर्ता बोलाउने निर्णयविरुद्ध सर्वोच्चमा रिट

काठमाडौं । सरकारले ११ देशमा कार्यरत नेपाली राजदूतहरूलाई फिर्ता बोलाउने निर्णय गरेपछि सो कदमविरुद्ध सर्वोच्च अदालतमा रिट दायर गरिएको छ। अधिवक्ता प्रतिभा उप्रेती र अनन्तराज लुईंटेलले संयुक्त रूपमा सर्वोच्च अदालतमा रिट दायर गर्दै उक्त निर्णय संविधान र कूटनीतिक मर्यादाविपरीत भएको दाबी गरेका छन्।

रिटमा भनिएको छ, “राजदूतहरूको कार्यकाल बाँकी रहँदासम्म सरकारले राजनीतिक स्वार्थका कारण उनीहरूलाई फिर्ता बोलाउने निर्णय गर्नु गैरकानुनी र अधिकार दुरुपयोग हो।”

रिट निवेदकहरूले अदालतसमक्ष राजदूत फिर्ता बोलाउने मन्त्रिपरिषद्को निर्णयलाई बदर गर्न माग गरेका छन्। उनीहरूको भनाइमा यस्तो निर्णयले नेपालको वैदेशिक सम्बन्ध र कूटनीतिक सन्तुलनमा नकारात्मक प्रभाव पार्ने जोखिम छ।

सर्वोच्च अदालतले उक्त रिटमाथि प्रारम्भिक सुनुवाइ कहिले गर्ने भन्ने निर्णय भने अझ तय भएको छैन।