हेटौंडामा साढे ४२ करोडको लगानीमा बन्ने भयो सुविधा सम्पन्न तरकारी बजार

हेटौंडा

हेटौंडा–११ थानाभर्याङमा सुविधासम्पन्न तरकारी तथा फलफूल बजार निर्माण हुने भएको छ । प्रदेश–३ सरकार र हेटौंडा उपमहानगरपालिकाको लगानीमा बजार निर्माणको तयारी अन्तिम चरणमा पुगेको हो ।

तरकारी बजारको लागि विस्तृत परियोजना प्रतिवेदन (डीपीआर) समेत तयार गरिएको छ । अबको दुईवर्षभित्र सम्पन्न गर्ने गरी थोक बजार निर्माण गर्न प्रदेश र स्थानीय सरकारले तत्परता देखाएका हो । थोक बजारको लागि प्रदेश सरकारले ७० प्रतिशत र हेटौंडा उपमहानगरपालिकाले ३० प्रतिशत लगानी गर्ने सहमति भएको छ । प्रदेशको भूमि, व्यवस्था, कृषि तथा सहकारी मन्त्री दावा दोर्जे लामाले तरकारी बजारको डीपीआर स्वीकृत गरी तत्कालै प्रारम्भिक वातावरणीय परीक्षण (आईईई) गरिने मन्त्री लामाले बताए । आईईई रिपोर्टपछि तत्कालै ठेक्का प्रक्रियामा जाने उनले बताए ।

चितवनको स्वराज कन्सल्टेन्टले डीपीआर तयार गरेको हो । डीपीआर अनुसार आधुनिक तरकारी बजार निर्माण सम्पन्न गर्न अनुमानित ४२ करोड ४९ लाख ७० हजार रुपैयाँ खर्च हुनेछ । तरकारी बजारभित्र ४० वटा थोक बिक्री केन्द्र निर्माण हुनेछन् भने ३० वटा खुद्रा बिक्री केन्द्र रहनेछन् । आफ्नो उत्पादन आफैंले खुद्रा बिक्री गर्न चाहने किसानको लागि छुट्टै ब्लक स्थापना गरिनेछ ।

उक्त ब्लकमा किसान आफैंले निर्धारित मूल्यअनुसार तरकारी तथा फलफूलको खुद्रा बिक्री गर्न सक्नेछन् । तरकारी बजारभित्र कोल्ड स्टोर, क्यान्टिन, एटिएम सुविधा, व्यवस्थित पार्किङको सुविधा, जेनेरेटर सब स्टेशन, आधुनिक अग्नि नियन्त्रण यन्त्र, व्यवस्थित तौल पुल, शौचालयलगायतका सुविधा हुनेछन् । व्यवस्थित तरकारी बजारमा दैनिक करिब ९ हजार मेट्रिकटन तरकारी तथा फलफूल खरिद बिक्री गर्न सकिने अनुमान गरिएको डीपीआर निर्माण कम्पनी स्वराज कन्सल्टेन्टका प्रतिनिधि सुदर्शन सेढाईले बताए ।

डीपीआरमाथि सोमबार मन्त्रालयमा भएको छलफलमा बोल्दै प्रदेश–३ का मुख्यमन्त्री डोरमणि पौडेलले प्रादेशिक कृषि बजार निर्माणपछि प्रदेशको अर्थतन्त्रको विकासमा ठूलो योगदान पुग्ने दावी गरे । तरकारी बजारको स्थापनापछि किसानले उचित मूल्य पाउने र उपभोक्ताले पनि सुलभ मूल्यमा तरकारी तथा फलफूल प्राप्त गर्ने उनले विश्वास व्यक्त गरे । तरकारी बजार निर्माणको लागि प्रदेशले बहुवर्षीय योजना अनुसार चालु आर्थिक वर्षमा एक करोड रुपैयाँ बिनियोजन गरेको छ भने हेटौंडा उपमहानगरपालिकाले पनि एक करोड रुपैयाँ बिनियोजन गरेको छ ।

चालु वर्षभित्र ठेक्का सम्झौता गरी काम सुुरु भएमा अर्को वर्ष आवश्यक बजेट जुटाइने प्रदेश कृषि मन्त्रालयका सचिव डा. योगेन्द्रकुमार कार्कीले जानकारी दिए । प्रदेशको कृषि क्षेत्रको ठूला तीन आयोजनामध्ये आधुनिक तरकारी बजार निर्माण पनि एक भएको भन्दै कार्कीले बजार निर्माणपछि सयौं जनाले प्रत्यक्ष तथा अप्रत्यक्ष रोजगारीसमेत पाउने उनले दावी गरे ।