महावीर पुनले जीतपुरसिमरामा बेचे करिब एक हजार चार सय किताब

सिमराः आफ्नो आत्मकथा समेटिएको किताब बिक्री गरेको आम्दानीले वीरगन्ज कृषी औजार कारखाना चलाउने अभियानमा रहेका महावीर पुनले जीतपुरसिमरा उपमहानगरपालिका क्षेत्रमा करिब एक हजार चार सय किताब बिक्री गरेका छन् ।

चार दिन अघि सिमरा आएका पुनले जीतपुरसिमराको अमलेखगञ्ज, पथलैया, सिमरा, डुमरवाना, जीतपुरलगायत विभिन्न स्थानमा उक्त संख्यामा किताब बिक्री गरेका हुन् । पुनः आइतबार सिमरा आएका थिए ।

राष्ट्रिय आविष्कार केन्द्रका अध्यक्ष समेत रहेका पुनले जीतपुरसिमरा उपमहानगरपालिका, वडा कार्यालय, विद्यालय, सहकारी, बैंक, उद्योग कलकारखाना र बजार क्षेत्रमा किताब बिक्री गरेका हुन् । उपमहानगरपालिकाको कार्यालयले मात्रै तीन लाख रकम बराबरको किताब खरिद गरेको स्थानीय युवा राजदास श्रेष्ठले जानकारी दिए । पुनलाई श्रेष्ठसहित रामचन्द्र लामा, रमेश थापा, विनोद सापकोटा, रघु लामिछानेलगायतका युवाले सहयोग गरेका थिए ।

सुदूरपश्चिम, कर्णाली, गण्डकी, लुम्बिनी हुँदै मधेस प्रदेश आएका पुन बुधवार वीरगन्ज जाँदैछन् । उनी दुई दिन सिमरास्थित होटल गौतमराज र दुई दिन होटल श्रेष्ठ रेसिडेन्सीमा बसेका थिए । होटल संचालकले उनलाई निःशुल्क खान र बस्नको व्यवस्था मिलाएका थिए ।

दुई सय १५ दिनदेखि किताब बेच्ने अभियानमा रहेका पुनले हालसम्म एक लाख ३१ हजार किताब बिक्री गरिसकेका छन् । उनि वीरगन्जमा किताब बिक्री गरेर मधेसका अन्य जिल्ला हुँदै कोशी प्रदेश जाने तयारीमा छन् ।