आन्ध्र प्रदेशमा आँप बोकेको लरी पल्टिँदा नौ जनाको मृत्यु, ११ घाइते

दक्षिणी भारतीय राज्य आन्ध्र प्रदेशको अन्नामया जिल्लामा आइतबार राति आँप बोकेको एउटा लरी पल्टिँदा कम्तीमा नौ जनाको मृत्यु भएको छ भने ११ जना घाइते भएका छन्। अन्नामया जिल्ला राजधानी अमरावतीबाट करिब ३८७ किलोमिटर दक्षिणपश्चिममा पर्ने पुल्लमपेटा क्षेत्रमा यो दुर्घटना भएको प्रहरीले जानकारी दिएको छ।

प्रहरीका अनुसार, लरीमा करिब ४० टन आँप थियो र करिब २० जना कामदारहरू लोडको माथि बसेका थिए। लरीले नियन्त्रण गुमाउँदा पल्टिएको थियो। पल्टिएको समयमा आँपका टोकरीहरू मजदुरहरूको माथि परेपछि केहीको मृत्यु भएको र केही घाइते भएका हुन्।

घाइतेहरूलाई स्थानीय बासिन्दा र आपतकालीन कर्मचारीहरूले उद्धार गरी नजिकैको अस्पतालमा लगिएको छ। प्रहरीले ओभरलोडिङ्का कारण दुर्घटना भएको जनाएको छ। लरीको चालकले भने विपरीत दिशाबाट आएको कारसँग ठोक्किनबाट बच्न प्रयास गर्दा लरी नियन्त्रण गुमाएको बताएका छन्।