शारीरिक अपाङ्गता भएकी नवीनाले नागरिकता पाउँदा हजुरबुबाको अनुहारमा खुसीको चमक

म्याग्दे गाउँपालिका–१  गुणादीकी २० वर्षीया नविना खनालले सोमबार नागरिकता प्रमाणपत्र प्राप्त गरेकी छन् । जन्मजात शारीरिक अपाङ्गता भएकी नवीनाले नागरिकता पाउँदाको क्षण उनका ७७ वर्षीय हजुरबुबा बासुदेव खनालको अनुहारमा उल्लास र सन्तोषको भाव झल्किएको थियो । मातृस्नेह नपाएका नवीनालाई हजुरबुबाले सानैदेखि पालनपोषण गर्दै आएका हुन् ।

वि.सं.  २०६२ माघ ११ गते जन्मिएकी नवीनाले २०६८ सालमा आमालाई गुमाएकी थिइन् । बुबाको परिचय नखुलेकी नवीनालाई म्याग्दे गाउँपालिकाले अपाङ्गता पुष्टि गरेर रातो कार्ड प्रदान गरिसकेको थियो । तर नागरिकता प्रमाणपत्र नहुँदा अपाङ्गता भत्ता लिनबाट वञ्चित हुँदै आएकी थिइन् ।प्रमुख जिल्ला अधिकारी रामकृष्ण अधिकारी स्वयं सोमबार नवीनाको घरमा पुगेर नागरिकता प्रमाणपत्र प्रदान गरे । जिल्ला प्रशासन कार्यालयबाट सम्पूर्ण विवरण तयार गरी औँठाछाप लिन बाँकी रहेको प्रमाणपत्र घरमै पुर्‍याएर प्रदान गरिएको हो ।

प्रजिअ अधिकारीले भने, “शारीरिक अपाङ्गता भएकाले कार्यालय आउन गाह्रो थियो, त्यसैले हामी आफैँ उहाँको घर पुगेर नागरिकता उपलब्ध गरायौँ । यस्तो कदमले नागरिकमा सरकारप्रतिको विश्वास र भरोसा बढ्नेछ ।”सो अवसरमा म्याग्दे गाउँपालिकाका अध्यक्ष श्रीप्रसाद श्रेष्ठ, वडा नं १ का वडाध्यक्ष मणिभद्र वाग्ले र अन्य स्थानीय प्रतिनिधिको पनि उपस्थिति थियो ।

वडाध्यक्ष वाग्लेले भने, “नवीनालाई नागरिकता नहुँदा अपाङ्गता भत्ताबाट वञ्चित रहनुपरेको थियो । सबैको पहल र सहकार्यबाट अन्ततः घरमै पुगेर प्रमाणपत्र दिन सक्यौँ, जुन सकारात्मक उपलब्धि हो ।”