पशुपति क्षेत्रका फूलपसल र अस्थायी टहरा १५ दिनभित्र हटाइने

२१ माघ, काठमाडौँ। पशुपति क्षेत्र विकास कोषले अव्यवस्थित फूलपसल एवं अस्थायी टहरा १५ दिनभित्र हटाउने भएको छ ।
कोषले सार्वजनिक सूचना प्रकाशन गरेर १५ दिनभित्र फूलपसल एवं अस्थायी टहरा हटाउन आह्वान गरेको हो ।

पशुपति क्षेत्रका मूल सडक, सहायक सडकका पेटी, डबली र खुला चौर, कैलाश डाँडा, मृगस्थली, गोरखनाथ क्षेत्र, वनगणेश, पञ्चदेवल वृद्धाश्रम, भकुण्डोल क्षेत्र समेतमा अव्यवस्थित फूलपसल एवं टहरा राखिएको कोषले जारी गरेको सूचनामा उल्लेख छ ।

यी क्षेत्रमा अव्यवस्थित तवरले छाप्रा बनाइ फूल एवं उपहारजन्य पसल सञ्चालनमा ल्याउँदा पशुपति क्षेत्रको सौन्दर्यतामा नकारात्मक प्रभाव परेको छ । जसका कारण विश्वका विभिन्न भागबाट आउने तीर्थयात्री एवं पर्यटकका माध्यमबाट विश्वभर सकारात्मक सन्देश प्रवाह हुनसकेको छैन।