अनियन्त्रित भई कार पोखरीमा डुब्दा दुई जनाको मृत्यु

सर्लाहीको बयलबासबाट महोत्तरीको गौशाला गइरहेको कार सर्लाही स्थित पोखरीमा डुब्दा दुईजनाको मृत्यु भएको छ ।

मंगलबार बिहान करिब ४ बजेको समयमा ईश्वरपुर नगरपालिका- २ मियाँखोरस्थित रहेको सरस्वती उच्च माध्यमिक विद्यालय स्कूलको पोखरीमा लु २ च ६७५८ नम्बरको कार अनियन्त्रित भई पोखरीमा डुब्दा दुई जनाको मृत्यु भएको जिल्ला प्रहरी कार्यालय सर्लाहीले जनाएको छ ।

सर्लाहीका प्रहरी प्रवक्ता प्रहरी नायव उपरीक्षक दीपककुमार श्रेष्ठका अनुसार मृत्यु हुनेमा कार चालक महोत्तरीको गौशला नगरपालिका १० बस्ने अन्दाजी ३८ वर्षीय सुरेश महतो र सोही कारमा सवार महोत्तरी कै सोनमा गाउँपालिका ८ बस्ने ३७ वर्षीय रामाकान्त ठाकुर रहेका छन् ।

कार अनियन्त्रित भई पोखरीमा डुब्दा कारमा सवार मध्ये गौशला २ बस्ने ३१ वर्षीय जनक यादव सकुशल बाहिर निस्किएका थिए ।

महतो र ठाकुर कारसहित पोखरीमा डुबेकोमा इलाका प्रहरी कार्यालय भक्तिपुरबाट ४ जना, इलाका प्रहरी कार्यालय केशरगंजबाट प्रहरी निरीक्षकको कमाण्डमा ९ जना र सशस्त्र प्रहरी सागरनाथ बेशबाट सशस्त्र प्रहरी निरीक्षकको कमाण्डमा ७ जना, सशस्त्र प्रहरी बल नेपाल नं. २ २ छिन्मस्ता बाहिनि बर्दिवासबाट सशस्त्र प्रहरी नायव निरीक्षक भक्त बहादुर खड्काको कमाण्डमा ९ जनाको गोताखोर टोलि खोजतलाश गर्ने क्रममा बिहान साढे ८ बजे शव फेला पारेका थिए ।

यस सम्बन्धमा थप अनुसन्धान भइरहेको प्रवक्ता प्रहरी नायव उपरीक्षक श्रेष्ठले जानकारी दिए ।