मुख्यमन्त्री बहादुरसिंह लामाको राजीनामा प्रदेश प्रमुखको कार्यालयमा दर्ता गरियो 

मुख्यमन्त्री लामाले आफ्नो राजीनामा पत्र सचिवालय सदस्य छत्र लामामार्फत प्रदेश प्रमुखको प्रमुख स्वकीय सचिव बलराम गैरेलाई बुझाएका हुन् । प्रदेश प्रमुख दिपक देवकोटा स्वास्थ्य उपचारपछि सोमबार हेटौँडा फर्किएपछि उक्त पत्र निवासमै बुझाइएको हो ।

प्रदेश प्रमुख हाल निवासमा आराम गरिरहेका छन् । प्रदेश सरकारको नेतृत्वमा आएका लामाले कुन कारणले राजीनामा दिएका हुन् भन्ने औपचारिक जानकारी सार्वजनिक गरिएको छैन । यद्यपि पछिल्लो समय दलहरूको नयाँ समीकरण बन्ने चर्चा चलिरहेको सन्दर्भमा उनको राजीनामा आएको हो भन्ने अनुमान गरिएको छ ।

राजीनामा पत्र प्राप्त भएसँगै अब प्रदेश प्रमुखले संविधानअनुसार नयाँ मुख्यमन्त्री नियुक्तिको प्रक्रिया अघि बढाउने छन् । प्रदेशसभा नियमावली र नेपालको संविधान अनुसार बहुमतको दाबी पेस गर्ने सांसदको नेतृत्वमा नयाँ सरकार गठन प्रक्रिया सुरु हुनेछ ।