प्रदेश प्रमुख नियुक्तिका लागि सरकारको सिफारिस, कुन प्रदेशमा को ?

रातोघर

 १८ कार्तिक २०७६, सोमबार २०:१६  मा प्रकाशित

काठमाडौं ।

सरकारले सातै प्रदेशमा नयाँ प्रदेश प्रमुख नियुक्तिका लागि राष्ट्रपतिसमक्ष सिफारिस गरेको छ ।

प्रधानमन्त्रीको सरकारी निवास बालुवाटारमा सोमबार बसेको मन्त्रिपरिषद बैठकले सात प्रदेशका प्रमुखको नाम नियुक्तिका लागि सिफारिस गरेको हो ।

सरकारले गरेको सिफारिस अनुसार प्रदेश–१ को प्रमुखमा सोमनाथ अधिकारी प्यासी, प्रदेश– २ मा तिलक परियार, प्रदेश – ३ मा विष्णु प्रसाईं रहेका छन् ।

त्यसैगरी, गण्डकी प्रदेशका लागि अमिक शेरचन, प्रदेश – ५ मा धर्मनाथ यादव, कर्णाली प्रदेशमा गोविन्द कलौनी र प्रदेश – ७ मा शर्मिला त्रिपाठीको नाम सिफारिस गरिएको छ ।

यसअघि सत्तारुढ दल नेकपाको सचिवालय बैठकले सातै प्रदेश प्रमुखका लागि उनीहरुको नाम सिफारिस गरेको थियो ।

सरकारको सिफारिसलाई राष्ट्रपतिले नियुक्त गरेपछि संघीय कानुन बमोजिम राष्ट्रपतिबाट पद तथा गोपनीयताको शपथ ग्रहण गर्ने छन् ।

सरकारले सिफारिस गरेका नयाँ प्रदेश प्रमुखहरुले मंगलबार (भोलि) बिहान राष्ट्रपतिबाट पद तथा गोपनीयताको शपथ ग्रहण गर्ने महासचिव विष्णु पौडेलले जानकारी दिए ।

राष्ट्रपति विद्यादेवी भण्डारीले मन्त्रिपरिषद्को सिफारिसमा नेपालको संविधानको धारा, १६५ को उपधारा (१) को खण्ड (ख) बमोजिम सातै प्रदेशका प्रदेश प्रमुखलाई आइतबार पदमुक्त गरेकी थिइन् ।

सो उपदफामा निजको पदावधि समाप्त भएमा वा सो अगावै राष्ट्रपतिले निजलाई पदमुक्त गरेमा प्रदेश प्रमुख पद रिक्त हुने व्यवस्था छ ।

-khabarhub

Write your Comment