अमलेखगञ्ज आयल निगमको ट्यांकर सिराहाबाट अपहरण

रातोघर

 ३ मंसिर २०७६, मंगलवार २०:०८  मा प्रकाशित

३ मंसिर, काठमाडौं ।

बाराको अम्लखेगन्जबाट विराटनगरका लागि छुटेको ट्यांकर अपहरणमा परेको छ ।

आइतबार राति १ बजे सिराहाको लाहानको मुख्य पूर्वपश्चिम राजमार्गको हुलाक कार्यालय अगाडिबाट ना ४ ख ४१६३ नम्बरको ट्यांकर अपहरणमा परेको नेपाल आयल निगमको विराटनगर डिपो प्रमुख अशोक साहले बताए ।

ढुवानीकर्ता राजेशकुमार गुप्ताको नाममा रहेको उक्त ट्याकंर राजमार्ग छेउमा रोकेर चालकहरु आराम गरेको बेला राति १२ देखि १ बजेको बीचमा अपहरणमा परेको डिपो प्रमुख साहले बताए ।

ट्यांकर अपहरणमा परेको कुरा चालकले मंगलबार बिहान १० बजे कार्यालय समयमा आएर बताएको उनले बताए । मोरङ र सिराहा प्रहरीसंग समन्वय गरेर अपहरणमा परेको ट्यांकरबारे खोजी थालिएको प्रमुख साहले जानकारी दिए ।

उक्त ट्यांकर मंसिर एक गते दिउँसो दुई बजे २० हजार लिटर डिजल लिएर अमलेखगञ्जबाट विराटनगरतर्फ जाँदै थियो ।

विराटनगर डिपो प्रमुख अशोक साहका अनुसार आइतबार राति खाना खाएर ट्याकंर चालक रामदेव यादव र सह चालक उमेश यादव ट्यांकरमा सुतेका थिए । मुखमा पट्टी बाँधेर आएका ६/७ जना नकाबधारी समूहले उनीहरुको आँखामा पट्टी बाँधेर जीपमा राखेर बर्दिबास र लालबन्दीबीचको जंगलमा छोडेर डिजल भरिएको ट्यांकर लिएर भागेका हुन् ।

Write your Comment