सिमरा, भदौ १६
बाराको सिमरामा अन्तराष्ट्रिय भेट्रान कप फुटबल प्रतियोगिता हुने भएको छ । सिमरा भेट्रान क्लबको आयोजनामा सिमरा रंगशालामा यही भदौ २९ गतेदेखि प्रतियोगिता हुन लागेको हो ।
प्रतियोगिताबारे जानकारी दिन सिमरामा आज पत्रकार सम्मेलनको आयोजना गरिएको थियो । स्वर्गिय मञ्जुदेवी गुप्ताको स्मृतीमा आयोजना गर्न लागिएको प्रतियोगिता असोज १ गतेसम्म चल्ने छ ।
प्रतियोगितामा १९ वटा टिमको सहभागिता रहने प्रतियोगिता संयोजक हरि चौधरीले जानकारी दिनुभयो । प्रतियोगिताको बिजेताले १ लाख ५० हजार र उप बिजेताले ७५ हजार रुपैया पाउने संयोजक चौधरीले जानकारी दिनुभयो ।
प्रतियोगिता बिदेशी टिमको समेत सहभागिता रहने उहाले बताउनुभयो । नेपाल र भारतका विभिन्न भेट्रान कप फूटवल प्रतियोगितामा सहभागिता जनाउदै आएको सिमराले दोस्रो पटक अन्तर्राष्ट्रिय स्तरको प्रतियोगिताको आयोजना गर्न लागेको हो । यसअघि देशभरीका भेट्रान क्लबको सहभागितामा २०७४ सालमा प्रथम संस्करण आयोजना भएको थियो । देशभरीबाट सहभागी हुने क्लबबाट राष्ट्रिय टोलीका पूर्व खेलाडी समेत खेल्ने हुँदा प्रतियोगिता रोमाञ्चक हुने अपेक्षा आयोजकले गरेको छ ।
जीतपुरसिमरा गोल्डकपले सिमरालाई राष्ट्रिय स्तरमा चिनाउन र फूटवलको विकास गर्न सहयोग गरिरहेको अवस्थामा भेट्रान प्रतियोगिताले थप मद्यत पुग्ने अध्यक्ष राजकपुर राउतले बताउनुभयो । अन्तर्राष्ट्रिय स्तरको प्रतियोगिता आयोजना गर्न मुख्य सहयोगीको भूमिकामा रहेका स्व. मञ्जुदेवीका छोरा श्यामबाबु गुप्ताले सिमरामा खेलकुद गतिविधिलाई निरन्तरता दिदै जानुपर्ने बताउनुभयो ।
देशको विभिन्न उमेर समुहको राष्ट्रिय टिममा सिमरासहित बाराका खेलाडीले स्थान पाउनुमा निरन्तर फूटवलको गतिविधिकै कारण सम्भव भएको गुप्ताको भनाई छ । नेपाली काग्रेसका महासमिति सदस्यसमेत रहनुभएका गुप्ताले फूटवल प्रतियोगितालाई आफ्नो आमाको नाममा आयोजना गर्न पाँउदा आफूले गौरवान्वित महसुस गरेको बताउनुभयो । पत्रकार सम्मेलनमा नेपाल पत्रकार महासंघ बाराका अध्यक्ष रेशम तिवारी, क्लबका उपाध्यक्ष समिर आले, सचिव केदार ढकाल, कोषाध्यक्ष उमेश चौलागाईसहित पदाधिकारी र सदस्य, संचारकर्मीको उपस्थिती रहेको थियो ।
प्रतियोगिताको अनुमानित बजेट करिब १० लाखको रहेको कोषाध्यक्ष चौलागाईले जानकारी दिनुभयो । सिमरा भेट्रानका अध्यक्ष राज कपुर राउतको अध्यक्षतामा सम्पन्न कार्यक्रमको सञ्चालन भेट्रानका सचिव केदार ढकालले गर्नुभएको थियो ।
Write your Comment