दिल्ली विस्फोटका पीडित अशोकको परिवार अब बेसहारा

दिल्ली । दिल्लीमा भएको बम विस्फोटमा ज्यान गुमाएका ३४ वर्षीय अशोक कुमारको घर अहिले सुनसान बनेको छ। बस कन्डक्टरको ड्युटी सकेर घर फर्किँदै गरेका अशोकका लागि त्यो साँझ जीवनको अन्तिम क्षण बन्न पुग्यो।

पहिले नै बुबा गुमाइसकेका अशोक परिवारका एक मात्र कमाउने सदस्य थिए। आमाको कमजोर स्वास्थ्य, पत्नी, दुई छोरी र एक छोरा—सबैको जीवन उनीमाथि नै टेकेको थियो। अब त्यो परिवार पूर्ण रूपमा बेसहारा बनेको छ।

परिवारका सदस्यका अनुसार अशोकले विस्फोटको केही मिनेटअघि मात्र घरमा फोन गरेर भनेका थिए, “केही बेरमै घर पुग्दैछु, बच्चाहरूका लागि बिस्कुट र दूध किनिसकेको छु।” तर त्यो फोन उनका आफ्नाहरूले सुनेको अन्तिम आवाज बन्यो।

स्वास्थ्य कमजोर भएकी आमालाई अहिले पनि अशोकको मृत्युको खबर दिइएको छैन। परिवारले उनलाई आघात नपरोस् भनेर सत्य लुकाइरहेको छ।अशोक दिल्लीमा सानो किरायाको घरमा बस्दै आएका थिए। उनका नातेदारहरू भन्छन्, “उनी अत्यन्तै मेहनती र जिम्मेवार थिए। हरेक साँझ परिवारका लागि केही लिएर घर फर्किन्थे।”

परिवारको सहारा बनेका अशोकले जीवनभर सबैलाई सम्हाल्ने वाचा गरेका थिए। तर नियतिको एक विस्फोटले त्यो वाचा सधैंका लागि अधुरो बनाइदियो।